المشكله فين بقا

السلام عليكم و رحمة الله و بركاته

اولاً كل رمضان و حضراتكم بخير

ثانياً اكيد كل اللى حيدخلوا لقراءة هذه الرسالة حيكونوا فاكرين انى بتكلم عن دار مسنين ليها وجود حقيقي بيننا

بس الحقيقه انا بعتذر لأن العنوان بتاع الرسالة دي مجرد حلم

حلم تاني يا منار ...؟؟؟؟!!!!؟؟؟

ايوة حلم

كل صديقاتى قالوا لى انه ربما اليوم هو ليلة القدر ...يعني يمكن دعائنا ربنا يتقبله ان شاء الله

فتمنيت بيني و بين نفسي ان لوكانت ابواب السماء مفتوحه ان ربنا يحقق الحلم ده للمسنين

الا و هو دار مسنين الخدمه فيها 7 نجوم بس تكون ببلاش

انا عارفه انه و لا فلوس الدنيا و لا بهجتها كلها تعوض اب او ام عن لحظه قاسيه بيقرر فيها ابنه وضعه بدار المسنين و ربنا بجد يا رب ميحكمش على حد بهذا ابداً و ربنا يصبر كل ام او اب ربنا اختبر صبرهم و ايمانهم و ابتلاهم بهذه المحنه

بس اللى احنا بكل اسف مش واخدين بالنا منه ان المسنين مش بس آباء وا مهات ضحايا لعقوق الأبناء ..و لكن من ضمن هؤلاء المسنين رجال و آنسات لم يتزوجوا اصلاً و وصلوا برده للسن التى لا يستطيعون معها رعاية انفسهم و بحاجه ماسه جداً لأشخاص يقومون برعايتهم و السهر على راحتهم

ايضاً من ضمن هؤلاء المسنين رجال و نساء فقدوا اسرهم بالوفاة الطبيعيه او في حادث فعادوا في وحده كما لو كانوا لم يتزوجوا او ينجبوا

بإختصار دار المسنين اد ما هي كلمة بتفجر الم البعض اللا انها كلمة لابد من وجودها في مجتمعنا من اجل هؤلاء الذين هم بحاجه لرعايه حقيقيه و الله كتب عليهم الوحده لسبب ما او لآخر

المشكله بقى فين ؟؟؟؟؟؟؟؟؟؟؟

المشكله ان 99% مثلاً من دور المسنين بمقابل مادي و على حسب المقابل بتكون الخدمات رغم ان هذه الدور تجمع تبرعات كثيرة جداً اللا انه تظل الخدمه بها سيئه و رديئه للغايه

كما نما الى علمى ان اقل مقابل بيدفع في دار مسنين حوالى 400 او 300 جنيه ان لم يكن 500

على اساس انه يا بلاش المسن قاعد واكل شارب نايم قايم ب500 جنيه

المشكله هومش في توفير مكان سكن و اكل و شرب و خلاص

المشكله في الشكل اللى بتتوفر بيه الخدمه دي

يعني ايه فايدة السكن اذا كان خانق او غير نظيف ؟

ايه فايدة الأكل اذا كان معدوم الطعم و اللون و الرائحه ؟

ايه فايدة الخدمه اذا كانت بالتذمر و الزهق و المماطله في تلبية طلبات المسنين او تلبيتها بطريقه غير لائقه و غير مكتمله

انا لا اعمم و لكنى واثقه ان ما اطرحه من سلبيات موجود بنسبة بجد لا تقل عن 90 % مع الرأفه

و اللى عايزه اقوله بإختصار يكمن في دعاء جميل تعملته يوماً في المسجد

يقول نص الدعاء

" اللهم اجعل اوسع ارزاقنا في خواتيم اعمارنا "

ف الأول و انا طفله كنت بخاف ادعي الدعاء ده ..كنت بقول بيني و بين نفسي

يااااااااااه لسه حستنى امّا اعجز و بعدين ربنا يوسع رزقي طب ليه ميبقاش كتير و انا شابه اعمل كل حاجه نفسي فيها

بس بعدين كل ما كنت اكبر سنه و افهم شويه اكتر كنت اعرف قيمة الدعاء ده

بعض الخيرين اللى بيدفعوا مال لدور الأيتام بيشوفوا انه رفاهيه شويه ان طفل يتيم كل ملابسه تيجي له ماركه و ان الشقه اللى بيسكن فيها تكون متشطبه تشطيب سوبر لوكس او انه يكون بيدرس في مدرسة لغات و بيمارس رياضه ف النادي

لكن المسن مش مفروض ابداً اننا نتعامل معاه بنفس المنطق ..

لان مهما كان وسطه الإجتماعي فحقه علينا انه يعيش في رفاهيه في آخر عمره

هذا ان تصورنا يعني ان المساحات الخضراء و الهواء النظيف اللى لازم يتوفروا في مكان السكن للمسن .....رفاهيه

و لو تصورنا ان العلاج الطبيعي و المشايات الكهرباء التى يجب ان يستخدمها كل و اى مسن ...رفاهيه

و لو تصورنا ان الأكل الصحي للمرضي المزمنين زي مرضي الكبد و الكلى و القلب ..رفاهيه

ولو تصورنا ان الملابس المصنوعه من خامات خفيفه تتناسب مع بشرتهم الحساسه في هذا السن ..برده رفاهيه

و كل اللى عايزاه هو نظرة لدور المسنين

..ماشاء الله في ناس كتير بتهتم بالمسنين من حيث الطعام بالذات في شهر رمضان

لكن هذا المسن بحاجه للعلاج ..و البعض منهم بحاجه للبامبرز" و اسفه شديد الأسف انى بذكر الجزئيه دي بس حبيت انبه الناس لأشياء قد لا يعلموها "

انهم بحاجه لسلطه خضراء نظيفه و مقطعه بشكل خاص جداً يتناسب مع حالة كل مسن ..اللى منهم عايز الجزر مبشور و اللى ممنوع عليه الخس و اللى لازم تقشري له الخيار ...و هكذا يعني

انهم بحاجه لأخذ حمام كل يوم مرة على الأقل

بحاجه لمن يصلح لهم حنفية الدش المكسورة او سيفون الحمام البايظ او يركب لهم درفة الدولاب المخلوعه او يغير لهم المرايه اللى اتكسرت

بحاجه لأكل سمك فيليه مسلوق بجرامات معينه

بحاجه للمشي 25 دقيقه كل يوم على الأقل

بحاجه لزبادي قليل الدسم بحاجه لكوب شاي في موعد معين

بحاجه احياناً للأيس كريم اقول لكم حاجه بجد

انهم بحاجه لورده بلدي

و كل ده محتاجينه بشكل دائم و مستمر و يومي

مش عارفه حضراتكم فهمتم قصدي و اللا لأ لغاية دلوقتي

اللى اقصده ان في بنات كتير و شباب اكتر بحاجه لفرص حقيقيه للعمل مستعدين يشتغلوا 12 ساعه ف اليوم بس على الأقل يكون الراتب 1000 جنيه ف الشهر عشان يقدروا يصرفوا على اسرهم

لو الخيرين خصصوا جزء فقط من زكاة اموالهم لتوفير فرص عمل للشباب في دور المسنين التى تعانى من تواضع الخدمات

حيكونوا ساعدوا اتنين في نفس الوقت ..اولاً ساعدوا الشباب اللى بحاجه لفرص عمل جاده و شريفه و مجديه و ثانياً منحوا المسن فرصة لحياة كريمه في آخر عمره

كمان ارجو من زميلتى و زملائي الأفاضل الذين يترددوا بأعداد كبيرة ما شاء الله على دور المسنين كل شهر مرة ..انهم يكملوا الرسالة بانهم في زيارتهم يبتدوا يبصوا بنظرة جديده لهذه الدور ..

يعني لو الحيطان محتاجه تتبيض تاني ده حيغير نفسية المسن كتير

لو عندهم فرصة لتوسعة المبانى اكثر يساعدوهم لعمل دور او دورين تانيين في سبيل توفير مساحات آدميه للمسنين

يا ريت يبصوا على السباكه ف الدار و يصلحوا المشاكل البسيطه

ايضاً اناره الدار هل تتوافر بالدار اضاءات مناسبه للحالات المختلفه هل توجد بعض ادوات العلاج الطبيعي بالدار

هل يوجد في الأثاث شئ بحاجه للتغيير او الإصلاح ..زي رجل كرسي او مقبض باب و غيرها من امور بسيطه نمر عليها اثناء الزيارة و لا يقودنا تفكيرنا لعملها و ربما لا نتخيل ان المسن يتضرر كثيراً من تلفها

اسفه انى طولت عليكم

بجد حاولت اختصر مقدرتش اختصر اكتر من كده

واملى من الله ان حضراتكم تفهموا الفكره التى اعنيها

انا لا اشير لدار بعينها و لكن لكل الدور التى تضع رسوم منخفضه للإقامه و بالتالى يترتب على ذلك خدمات منخفضه لهم ايضاً و ادعوا الله ان ينظر كل من يقرأ رسالتى تلك لأقرب دار مسنين بجواره و يحاول ان يمد لهم يد العون

شكراً

مهندسه / منار ممدوح عقل

اللهم اجعلنى خيراً مما يظنون و اغفر لى ما لا يعلمون و ارحمنى يوم يبعثون

منقول من المهندسة

منار عقل